الثلاثاء، 17 أغسطس 2010

أنا دكتور..نفساني !! ج2

( 6 )
على بوابة المستشفى..كان فيه حارس شكله كده طيب..
- سلام عليكم..
- وعليكم السلام..هو حضرتك داخل جوه..
- أيوة..أنا داخل أشوف الوضع..أصل أنا أول مرة آجي هنا..
- أهلا وسهلا..حضرتك هتنورنا..
- متشكر يا سيدي..هو مكتب المدير فين..
- هناك كده..في الدور الأول..
- شكرا..
- حضرتك تؤمر..بس متأكد إنك داخل جوه فعلا..؟!
- يابني داخل..والله العظيم داخل..سبحان الله..!
- طيب..مع السلامة يا بيه..!
إيه الراجل الغريب ده..!!

( 7 )
كان فيه جنينة واسعة جدا حوالين المستشفى..
كان نفسي قوي أقابل حد من المرضى..ولقيت واحد قاعد سرحان لوحده..
- صباح الخير..
بص ليا بابتسامة كبيرة , وقال لي..
- صباح النور..
- ازيك..أنا اسمي أحمد..
- وأنا شاكر..
لمحت هدومه الملخبطة..وذقنه الطويلة..
الغريب إنه كان لابس كرافت..!
- انت هنا بقالك كتير..؟
- يعني..
- وإيه اللي جابك هنا..؟
- التكليف..!
آه..هيا الحكاية كده..التكليف السماوي , والوحي , والرجل المنتظر..
- ومين اللي كلفك بقى يا شاكر..؟
- وزارة الصحة..!!
وزارة الصحة ؟!! جديدة دي..!!
- وبتاخد فلوس على كده بقى ؟
- أي كلام..هيا لولا الحوافز كان الواحد فضل عايش..!!
حوافز ؟! حوافز إيه..؟!
- بس هما لما يعملوا الكادر , الوضع هايتغير.!!
كادر ؟! كادر إيه..؟!
في اللحظة دي ..جاءت واحدة بنت حلال.. لابسة - خير اللهم اجعله خير –أبيض في أزرق في أحمر..( شكلها بتاكل لافاش كي ري )المهم..الست دي قالت..
- الحالات جاهزة يا دكتور شاكر..!!
دكتووووووووور ؟!!
- فرصة سعيدة يا أبوحميد..!
يا رااااااااجل..!!

( 8 )
بدأت ثقتي تهتز شوية بنفسي..يانهار أسود..ده كان دكتور..!
المهم..و أنا داخل المبنى..اتخبطت في واحد خارج من الباب..كان باين عليه مشغول قوي..
قال من غير ما يبص لي ..
- معاك قلم..
- قلم..؟ أه..اتفضل..
قعدت أتأمل فيه شوية, وسألته..
- حضرتك شغال هنا..؟
- أه..
إممممم..شكله دكتور تاني..
- أمال فين الكرافت..؟!
- نعم..
- لا أبدا.. حضرتك خلصت القلم..؟
فضل واقف شوية وهو ماسك القلم..
- آه..إحم.. القلم..!
- ماله..
- مش هتكتب بيه..؟
- قلمك مش بيكتب..!
وقبل ما أرد عليه..عدى واحد لابس – خير اللهم اجعله خير – أبيض في أصفر في أخضر..( هو الراجل ده نيجيري؟ ) وقال..
- إرجع سريرك يا جمال..ميعاد الحقنة مش دلوقت..!
سرير..؟! حقنة..؟!
يارااااااااجل..!!

( 9 )
وقفت قدام غرفة المدير..دقيت الباب ودخلت , وأنا ثقتي في قراري بقت زي الهباب..
لقيت واحد قاعد وراء المكتب وكان لابس خير اللهم اجعله خير- بدلة بني وقميص بني وجزمة بني..( الراجل ده بيحب الحشيش ؟ )
- نعم..
- احم..حضرتك المدير..؟!
- أيوة..
- حضرتك متأكد..؟
- لأ..أنا الرقاصة..! يعني هاكون إيه غير المدير.. انت مين؟!
- حضرتك أنا الدكتور أحمد..أنا جديد هنا..
- جديد..؟! يا أهلا..صبحنا وصبح الملك لله..وكمان دكتور ؟! ده إنت فلة..!!
- أفندم..؟
- لا أبدا..وإنت جاي لوحدك بقى..
- أيوة..
أمال هاجي مع العيلة.. إيه الراجل الغريب ده ؟
- أيوة..؟ ده إنت فللللللة..!!
هو إيه الموضوع..؟!
- أوراقي جاهزة يا أفندم..هاستلم الشغل امتى..
- تمام..تمام..انت بقى جاهز..؟
- لإيه بالظبط..
- علشان الجلسات..ماهو كل دكتور جديد لازم يا خد جلسات..!
- جلسات إيه..؟!
- جلسات كهرباء..!!
يا رااااااااااااااااااااااااااااااااااااااااااجل..!!
لأ بقى..لحد كده وكفاية..
هو ده المدير..؟! هما دول الدكاترة..؟! هما دول العيانين..؟!
يا خبر إسود..!!

( 10 )
أنا لقيت الحكاية كده..قلت بس..هيا غلطة..هاروح وأطلب السماح من أمي , وعمي , وعمرو , ونيفين ..
أنا جايلك يا نيفين..!
أخدت ذيلي في أسناني.. وجريت على البوابة..وهناك قابلت الراجل الطيب إياه..
- سلام عليكم يا عم الحج..
- على فين كده يا بيه..
- أنا ماشي.. ربنا معاكم..
- ماشي فين بس.. لا إله إلا الله..
- أنا هاروح أشتغل نسا وولادة..واللا أشتغل جراحة..أقولك..أنا هاشتغل رقاصة..!
هو ماسك ذراعي كده ليه..؟!
- يا حول الله يا رب..اهدا بس يا بيه..هو أول يوم بيبقى صعب..بعد كده بتتعود..
سلطان..يا سلطان..!
- أتعود مين..وسلطان إيه..يا بني إوعى..!
- أنا قلت ميت مرة لازم حد يستلم الحالة..مش معقول كده..!
- حالة إيه..يا عم أنا الدكتور الجديد..
- طبعا..طبعا يادكتور..إنت جديد.. وأنا جديد..وربنا معانا كلنا..
مرسي..يا مرسي..!
- إنت باين عليك تبعهم..أوعوا..سيبوني..
آآآآآآآآآآآآآآآآآآآآآآآآآآآآه..!!

*-*-*
ومن يومها , ماخرجتش من المستشفى.. ومفيش حد راضي يصدق إن أنا دكتور..
النهاردة بقى وأنا نازل من عند المدير..لقيت واحد طالع على السلم..
ومش عارف إيه اللي خلاني أطلب منه قلم..
حد يعرف..؟!!

الخميس، 5 أغسطس 2010

أنا دكتور..نفساني !! ج1

بعد فترة طويلة من البهدلة في أقسام الكلية المختلفة ..استقر رأيي على التخصص في الطب النفسي..
أعتقد أنه فرع لطيف ( ربما لأنني لم أعرف عنه شيئا في أيام الدراسة ! )..وأعتقد أيضا أنه يمثل الكنز المفقود بالنسبة لي..
لكن..
لا بد أن تحدث بعض الأمور..!!

( 1 )
كانت ماما تناديني..
- أحمد..
- أيوة يا نينة..( على أساس إني أحمد رمزي مثلا ! )
- هو إنت مش دكتور..
- تقريبا كده يانينة..
- يعني إيه..
- أن بس مستني أختار التخصص, وأبقى دكتور بحق وحقيقي..
- هو انت نويت تتخصص إيه..
- أمراض نفسية وعصبية إن شاء الله..
- يالهوي..!! ليه يابني كده..ياحول الله يارب..!!
- إيه بس يا ماما..؟ ( بلاها أحمد رمزي دلوقت ! )
- أقول للناس إيه..يا رب لا اعتراض على حكمك..!!
- يا ماما أن هابقى دكتورنفسي..أمال لو قلت ليكي مريض هاتقولي إيه ؟!
الكلام ده كان في دخلة أختي من الباب..
- فيه إيه يا نينة.. ( على أساس إنها زهرة العلا طبعا ! )
- الحقيني يا بنتي..أخوك عايز يبقى دكتور مجانين..
- ما أنا طول عمري أقول الكلام ده..جالك كلامي..؟!
- بس يا حبيبتي.. مش ناقصاكي..
- ياللا يابتاع العباسية يا مجنون..!!

( 2 )
رن جرس التليفون..رفعت السماعة..كانت خالتي فوقية..
- ازيك يا حبيبي.. أما بقى جبتلك عروسة.. إنما لقطة..!
أصل خالتي دي مش فارقة كتير عن أم السعد..
- بجد يا خالتي.. شكلها إيه دي..
- قمر يا حبيبي..إنت وهي فولة واتقسمت نصين..!!
طب الحمد لله إنها مش أحلى مني..!!
- بس قوللي..انت دكتور إيه..؟
- أنا دكتور أمراض نفسية يا خالتي..
- .................!
- خالتي.. خالتي..
- .....................!
- خالتي..انت ياولية..!هيا العروسة اسمها إيه..
- عروسة إيه يابني , كفى الله الشر..إحنا هانروح نفضح نفسنا..روح يا بني ربنا يهديك..!!
- يا خالتي..
خالتي قفلت السكة في وشي..!!

( 3 )
كنت طلعت أنام شوية.. وفجأة صحيت من النوم مفزوع على صوت خبط جامد..
قلت لنفسي أكيد دول أمن الدولة..أخيرا جم..!
- مين..؟! عمي..أهلا وسهلا..!!
يعني..مش هاتفرق كتير..!!
- أهلا يا عمي..اتفضل..
- لا أهلا ولا يحزنون..أمك اتصلت بينا وبتجول ( بتقول) إنك هاتبجى (هاتبقى) بتاع مجانين..صح - بضم الصاد - ( صح - بفتح الصاد ) الكلام ده..؟!
- ياعمي أنا هابقى ( هابجى) دكتور أمراض نفسية وعصبية..
- يا خبرك أسود من عيش الحكومة..يعني صح ( صح ) الكلام..واحنا رافعين راسنا في البلد..ونجول ( نقول) الدكتور راح..الدكتور جه..وانتا ماجبتلناش (ما جبتلناش..هيه كده!) غير العار..!
- عار ؟! انت شايفني داخل عليك بعيل ؟!
- هيا كلمة..لو فضلت ماشي في السكة البطالة دي..يبجى ( يبقى) مش عايزين نشوفك بعد كده..
- يا عمي..
- ولا كلمة..البلد لسه فيها رجالة..يا خسارة يا ولاد..لو أبوك كان عايش , كان زمانه جتلك (قتلك..دي مفهومة !) وخلص عاره..
الكلمتين بتوع عمي دول ,هزوني من جوه قوي..لدرجة إني طلعت أوضتي متأثر جدا..قفلت الباب.. واترميت على السرير..
ونمت..!!

( 4 )
لما رجعت من بره..لقيت أختي عندنا , ومعاها كام شنطة..
أول ما بصت في وشي..صرخت..
- منك لله..منك لله..خربت بيتي..!
هو إيه الموضوع..؟!
اتصلت بالأخ جوزها علشان أفهم..
- ألو..أيوة يا باشمهندس..خير..
- أختك عندك يادكتور..وحاجتها تيجي تاخدوها بكرة..وورقتها هاتوصلها كمان يومين..
- يا سيدي إحنا عندنا ورق كتير..بس عايز أفهم..
- يادكتور أنا انسان ليا مركزي المحترم..ومايصحش أخو مراتي يبقى دكتور مجانين..!
انسان..؟ ليه مركزه..؟ محترم..؟!
إيه الكلام الغريب ده..؟!
آه..هو الموضوع كده..
المهم رحت لأختي وحاولت أهديها بكلمتين..
- ولا يهمك..ده ماكانش يستاهلك..وكان دمه تقيل..
ده حتى اسمه عمرو.. ده اسم يقابل بيه ربنا..؟!
ما علينا..
بس هيا عيني قعدت توجعني شوية بعدها..
ولونها بقى أزرق بقدرة قادر..!!

( 5 )
بعد شوية خرجت علشان أقابل نيفين..هيا الوحيدة اللي باقية لي..
وعلى الكورنيش..
- مالك يا أحمد..
- أبدا.. متضايق شوية..
- من إيه..
- الموضوع ياستي إني عايز أبقى دكتور نفساني..بس المشكلة..
إيه..فيه إيه يا نيفين..؟!
كانت بتبرق في وشي بطريقة غريبة , وقامت من مكانها..
- نيفين..مالك..؟!
- لو سمحت يا أستاذ عيب كده..
أستاذ..؟!
البنت حصلها إيه..؟!
هنا بقى الدنيا بقت ظلمة..
اللي أنا فاكره.. إنهم ييجوا اتنين كده..أصغرهم بيشتغل نص نقل..
وأنا كنت بنادي على نيفين..
- نيفيين..نيفيييييييييييين..!!
وبس يا سيدي..آدي آخرة الشهامة..
من يوميها..عيني التانية بقت زرقاء هيا كمان..!!




*-*-*
ولو..
مهما حصل..
أنا رايح أقدم أوراقي في المستشفى..
حالا..!!

الأربعاء، 5 مايو 2010

وبقيت أنا العميد..!

يا سلام ياولاد..مرة واحدة كده وبدون مقدمات..جالي واحد خير اللهم اجعله خير..لابس أبيض × أبيض وقال لي بصوت جهوري" يا ولد يا عويس انت بقيت العميد"..!!

بكل دهشة : "وحياة أبوك بتتكلم جد..ده أنا ملعبتش ولا ماتش مع المنتخب "..

قال لي " كورة إيه وكلام فارغ انت بقيت عميد الكلية .. ألف مبروك "..!!

بعد أن تجاوزت حالة الاحباط , واقتنعت إني - بعد الشر - بقيت العميد..بدأت فعلا أفكر هاعمل إيه ..؟؟ يا سلام..انا العميد بقي..ده أنا كنت أول حاجة أعملها أطلع مكتب العميد.. آه..وادخل كده من غير استئذان ولا يهمنى..عميد بقي.. !

ولازم أخلي أصحابي يبعتوا لي تهاني علي ميلودي وروتانا ودريم وكل القنوات الفضائية ..

" إلي العميد الروش طحن ألف مبروك..!" يا سلام.. وأقعد في مكتب العميد ولا يهمني..وأجيب يافطة وأكتب عليها العميد.. من أول الكلية يفط بقي.. "مكتب العميد 600 متر" , "مكتب العميد 599 متر"," مكتب العميد... إلخ ".. لغاية "أهلا بك في مكتب العميد"..!!

وبمناسبة اليفط..الدكتور اللي مش ما يعلق لوحة يهنيني , هاعلقه انا مكان اللوحة..والطلبة كمان..كله لازم يهني, و اللي مش عايز يجيب لوحة..يديني حقي ناشف مش مشكلة.. واهه كله من اجل العلم..!!

اه.. وأرفع شعارات بقي واتبنى قضايا واحط لي شوية قوانين كده تضمن لنا التميز أن شاء الله..!!

لائحة قوانين كلية طب لسنة الله أعلم:

· مصلحة الطالب فوق كل اعتبار..ما عدا مصلحة الدكتور ومصلحة رئيس القسم ومصلحة العميد.

· الدروس الخصوصية رجس من عمل الشيطان..ولكن لا مانع أبداً من تعليق إعلاناتها فى الكلية..وتوزيعها باليد..بل واعطائها في مكتب العميد.. ما دام الدكتور ها يقسم معايا..!

· المحاضرات: حضور المحاضرات هو حرية شخصية لأي طالب مش في كلية الطب بتاعتي..ولن أجبره على الحضور بشيت أو بالأمتحان..أنا مش بتاع الكلام ده..الغياب هيتاخذ كل محاضرة اسم اسم ..والغايب يدفع 100 جنيه وكله في سبيل العلم..!

· كتاب القسم هو فرض عين علي كل طالب..وللطالب حرية المذاكرة من أي مصدر سواء كتب أو مذكرات أو مراجع أو نت ما دام ييشتري في اول السنة كتاب القسم.

· الامتحانات: هى وسيلة تقييم الطالب وهى سرية جدا..ومن أجل السرية , تكتب بشفرة معقدة وتقدم للطلبة دون حل هذه الشفرة حفاظاً علي السر..هى كده طول عمرها أصلاً..!

· التعيين في الجامعة: يلغى تماما التعيين بالوساطة أو الكوسة أو المحسوبية..ونلجأ لحل علمي منطقي سليم هو تحليل DNA وإثبات نسب ودرجة القرابة لأحد من الاساتذة ويتم التعيين دون مشاكل..

· علي المتضرر أن يشكو للهيئة المختصة بشكاوى المتظلمين من قرارات التعيين..( فين دي؟! )

· يتم الشرح لجميع الطلبة علي نفس الجثة في التشريح أو حتى الاستغناء عن الجثة والاستعانة بالخيال..لأن اكرام الميت دفنه..واحنا كرماء بالصلاة على النبي..!

· للطالب حق المشاركة في النشاط السياسي..وللكلية حق الابلاغ عنه..وللأمن حق تظبيطه..!

· علشان الأيزو..سيتم شراء أجهز كمبيوتر وميكروسكوبات وأجهزة معملية حديثة مع تدريب بعض الطلبة عليها , للظهور بمظهر مشرف يوم مجئ لجنة المتابعة..ثم بيع الأجهزة بعد ذلك والأحسن تأجرها..!

· تطبيق مبدأ الحسنة تخص والسيئة تعم..طبعا تخص ولاد الدكاترة وتعم عالباقي..!

· الشفوى درجاته تقل منعا للظلم..والتحريري درجاته تزيد مع تسريب الامتحان ودخول الكنترول..!

· الاكتفاء بكارنيه الكلية لأخذ غياب الطلبة فى جميع السكاشن والراوندات..وذلك توفيراً على الطلبة..مع جعل الكارنيه بـ 500 جنيه..!

· مجموعات التقوية مهمة ومفيدة وتكون فى نفس الوقت لجميع المواد..بحيث لا يستطيع الطالب أن يخص هو مادة واحدة..الكلية مش ناقصة زحمة..!

هكذا وبعد أن أرسيت القواعد بقى أن أمارس سلطاتى واتابع واشرف ولكن هذا فى بوست آخر..!!

الأربعاء، 10 فبراير 2010

لوج بوك..*

هي دي البدعة الجديدة اللي كل قسم في الكلية خرج بيها السنة دي..علشان يطبقوها على الطلبة الغلابة اللي زينا..والطلبة اللي في الدفعات التانية..

وحيث أن كل بدعة ضلالة..وكل ضلالة في - كلية الطب - هتبقى في النار إن شاء الله..إذن..نفهم من كده إن الموضوع فيه مؤامرة من الخارج لزعزعة الاستقرار الداخلي في الكلية..وزرع الفتنة الطائفية..!

و المقصود بالكلمة الأعجمية – يعني موجودة في المعجم – " لوج بوك " واللي حطينا عليها نجمة في أول الموضوع..هو دفتر المتابعة.. الدفتر الموجود فيه أوراق عن الحالات المفروض إن احنا نشوفها..والمفروض نأخذ منها تاريخها المرضي..والمفروض نلاحظ العلامات الاكلينيكية..والمفروض نطلب لها التحاليل والآشعات..والمفروض بعد كل ده - شوف إزاي - نتوصل للتشخيص النهائي..!!

أنا بقول ده المفروض..

ومعنى ده إنه كان لازم يحصل..بس ماحصلش..ومستحيل يحصل..!!

وحيث بقى إن دي بدعة..فهي خروج عن الملة..والواحد ياعم مش ناقص ذنوب..

هو الدين بيقول إيه..مش بيقول اتصرف..!

على الأساس ده احنا اتصرفنا..!!

*-*-*

مثلا..عندك قسم الأطفال..الدفتر ده ماكانش دفتر..ده كان كتاب..!

آه والله..يعني الحكاية ناقصة..

كنا لسه في أول السنة..والدكاترة شادين حيلهم بقى..كل شوية..فين اللوج بوك..فين اللوج بوك..فين اللوج بوك..

اللي مش معاه..كان بيتصلب على باب القسم.. !

الكلام بدأ يأخذ منحنى خطير..يا إخوانا النهاردة امتحان..لازم نتصرف..

اخترنا سامي.. واد طيب وابن حلال.. وليه في المذاكرة والحاجات دي.. أعوذ بالله..!

سامي اتوكل على الله..طلع قسم الأطفال..نص ساعة ونزل.. هجمنا كلنا عليه..وقعدنا ننقل منه.. لكن محمود وابراهيم اعترضوا..

محمود ده واد سيس أصلا..بتاع مباديء وشعارات وحاجات كده.. سيبك منه..

المهم ابراهيم.. هو اللي كان ليه وجهة نظر..

مش معقول نكون خمسة وعشرين واحد..وكلنا أخدنا نفس الحالة..

بصينا لبعض..ابراهيم ده دماغ برضه.. طب إيه الحل..؟!

ابراهيم قال..نغير الاسم..يعني لو الوله اسمه سيد على بعضه فؤاد..أنا مثلا أكتب سيد خليل معلش..زكي هايكتب مرسي عطا الله جربون..وعلى هذا المنوال..

الاسم الأصلي بقى ابراهيم احتفظ بيه..اعترافا منا بفضله..وسامي كمان احتفظ بيه..علشان الحكاية تبقى تمام..قال يعني الاثنين أخذوا نفس الحالة صدفة.. سبحان الله..!!

ده مايمنعش إن فيه حركات غبية حصلت من بعض الزملاء..يعني واحد كتب اسم المريض على اسمه الثلاثي.. فرحان بنفسه قوي..!

واللا التاني اللي كتب اسم الواد..بيتر عبد الله مخيمر..قال يعني الوحدة الوطنية مقطعة بعضها..!

لكن عدت..

الغريبة إن كلها عدت.. حتى الواد بتاع بيتر عبد الله..!

محمود هو اللي صمم يروح القسم ويأخذ حالة تانية.. من حظه الإسود طلع اسم الوله هو نفسه اسم الدكتور اللي هايمتحنه..!

محمود بعد ما طلع من اللجنة بقى واحد مننا..!!

*-*-*

في قسم الباطنة العملية اختلفت شوية..

حبكت مع رئيس القسم إنه يعمل امتحان مفاجيء..عملي..وكل واحد يدخل القسم ويختار حالة يكتب عنها..

المرة دي..كل واحد اعتمد على نفسه.. وأنا دخلت..ودعيت ربنا يسهلها ليا..

ما أنا غلبان أصلا..!

أول ما دخلت.. لقيت المريض نايم.. وحاجات كتير داخلة وخارجة منه..

الراجل صعب عليا جدا..أنا مش عايز أصحيه..ماهو مش هايبقى المرض والدكاترة وأنا..!

عدى واد نايب كده شكله ابن حلال..شاف الورطة وفهم الوضع..قاللي اكتب ورايا..

المريض كذا كذا..ويعاني من كذا كذا..وبقاله ييجي كذا عامل كذا كذا كذا..

وأنا فرحان..عمال أكتب وأكتب وأكتب..!!

المهم دخل الدكتور..وسبحان الله..كان هو رئيس القسم..ما هو أنا غلبان..!

سألني..إيه يابني..الراجل ماله..

أنا حبيت أظبط المسألة.. مسكت الورق وقلت بكل فخر..المريض قاللي..

بس ياعم..الدنيا بقت ضلمة.. الدكتور قعد يشخط ويزعق..المريض قاللك..قاللك..؟!

إيه ياجدعان..هو الراجل طلع أخرس والنايب خبى عليا واللا إيه..

بس أنا كنت ظلمته..لأنه اتضح إن الراجل في غيبوبة من حوالي تلات أيام كده.. معجزة فعلا إنه يصحى يقوللي..ويرجع تاني..!

و تلاقي الواد النايب مايعرفش أساسا إنه دخل في غيبوبة..

النايب ابن ال.......... !

لكن عدت..

الغريبة إنها عدت.. وجبت الدرجة النهائية في الامتحان كمان..!!

*-*-*

في قسم الجراحة..العملية بقت أحسن شوية..

أي حاجة..في أي حاجة..

ويوم الامتحان العملي..دخل سامي القسم..إنه يلاقي عيان ياخد منه كلمة تنفع..أبدا..

سامي يسأل عن الناس..يا إما في العمليات..يا في المشرحة..!

الواد احتار..الرجالة كلهم معتمدين عليه..

فين وفين..لما لقى واحد قاعد لوحده على سريرفي ركن كده..

سامي مسك الراجل وهاتك ياأسئلة..اسمك إيه..إيه اللي تاعبك..من امتى..

الرجل كان فرحان إن في حد مهتم بيه كده.. سامي طلع ومعاه ورق زي الفل.. طبعا كلنا قعدنا ننقل منه..ومن غير تغيير أسامي المرة دي.. الغريبة إن الراجل كان بيشتكي من القولون العصبي..بس..طب إيه اللي مدخله قسم الجراحة..

ما علينا..دخلنا الامتحان واحد واحد..بس اللي كان بيدخل..مش كان بيطلع..

إيه الموضوع..؟

بعد ما جاء دوري في الآخر..دخلت..الدكتور بيسأل..معاك حالة مين يابني..

قلت..معايا حالة فلان فلان الفلاني..

الدكتور قعد يضحك..ويضحك..!

عرفت بعد كده – زي بقيتنا – إن فلان ده مش كان مريض ولا حاجة..ده كان مستني أخوه اللي في العمليات.. ( طب مش كان يستنى في المشرحة أضمن له ؟ )

طبعا التداعيات المؤسفة حصلت بعد كده..

كلنا بقى عندنا قولون عصبي..وسامي شكله بقى مختلف تماما بعد كل الضرب اللي أخذه..والدكتور نقصنا كلنا في الامتحان..ماعدا ابراهيم..أخذ الدرجة الكاملة..لأنه مش جه الامتحان أصلا..!!

بس عدت..

والله العظيم عدت..!!

وعدت كمان في الرمد والأنف والأذن والحنجرة وفي السموم....إلخ..إلخ

الحكاية الكبيرة بقى في آخر امتحان..امتحان النساء والتوليد..

كنا عدينا في امتحان أعمال السنة بعد ما لعبنا..أ..احم..امتحنا بطريقة الكل في واحد..

سامي كتب اللوج بوك بتاعه..آخر تمام.. ويوم الامتحان..اللي كان عليه الدور..ياخد اللوج بوك بتاع سامي..يكتب اسمه بالرصاص..يدخل..يخرج..يديه لزميله..يمسح الاسم..ويكتب اسمه هو..يدخل..يخرج..يديه لزميله..وهكذا..!!

وعدت ياعم..

بس مش عارف مين اللي وصل الحكاية لرئيس القسم..قبل امتحان العملي النهائي..الراجل عمل محاضرة قبل الامتحان بأسبوع.. وشتايم بقى و كلام من إياه..

وياويله وياسواد ليله اللي هاييجي الامتحان من غير اللوج بوك..

يانهار أسود..المرة دي شكلها مش هاتعدي خالص..

باقي أسبوع ومافيش وقت..ده الواحد يكون عايز يدخل الحمام ,بيدخل أبوه بداله..!

اتصلنا بسامي..اللوج بوك ياسامي..سامي رفض..

يانهار - لتاني مرة - اسود..!

ياواد يا سامي..ياعم سامي..ياسامي باشا..

أبدا..

اتصلنا بابراهيم..ابراهيم قعد يضحك..

قال إن سامي منزل صورة من الكتاب في مكتبة أبو بطة..والنسخة بعشرين جنيه..

يانهار - اتالت مرة -أسود..!!

ياسامي يابن ال...............!!

طبعا كلنا دفعنا..ماهو مافيش وقت نصور..مافيش وقت نكتب أصلا..

اللي جاب الكتاب لخطيبته علشان تنسخه..واللي جابه لأخوه الصغير..واللي جابه لمدرس انجليزي..

فوضى..!!

الغريب ان ابراهيم كان بيقعد يضحك على كل الحكايات دي..

وأنا قعدت أقوله..يابرهيم..اللوج بوك يابرهيم.. الراجل توعدنا بالثبور..

الثبور يابرهيم..! يعني احتمال يجيب ناس من الكفار يعملوا فيك حاجات مش ولا بد..وانت مش حمل حاجة من دي يابرهيم..!!

وبرهيم ولا هو هنا..

ده يوم الامتحان..الكل جاي باللوج بوك..كامل و جاهز..ومرسوم كمان..

وهو جاي واللوج بوك بتاعه أبييييييييييييييييييييييييض..أنا كنت مش مصدق وهو في إيدي..!

قبل ماندخل الامتحان بقى..سمعنا الخبر الصاعقة..

رئيس القسم اتغير..والرئيس الجديد قال الامتحان من غيراللوج بوك..

يعني اللوج بوك ولا حاجة دلوقت..!

طول الامتحان بقى..ابراهيم وسامي كانوا بيضحكوا..!!

ابراهيم وسامي..ولاد ال.................!!

معلش..

الصبر..

الامتحان مصيره يخلص..!

*-*-*

بعد الامتحان واللي حصل فيه..

قعدنا ندور على سامي وابراهيم..علشان نوريهم الحاجات اللي بيعملها الكفار..

قعدنا ندور كتير..بس من غير فايدة..

وعرفنا بعد كده إن سامي حول لكلية طب ليبيا.. وابراهيم طلب اللجوء السياسي في الصعيد..!!*

بس الحكاية انتهت.. والأمور عدت على خير..

وخلصنا الكلية والحمد لله..!

*بالمناسبة..أنا احتفظت باللوج بوك الأبييييييييييييييييييييييض بتاع برهيم كدليل على كلامي..للي عايز يشوفه..!

والغايب مصيره يرجع يابرهيم..!!

ملحوظة ما..

كان من المفترض أن يكون الموضوع القادم من ابداعات الأخ عويس التاني..

لكن نظرا لنوبة الغرور التي أصابته بعد نشر بعض أعماله " العظيمة " في كتابين.. وبعدما كسب رهانه معي.. الذي اضطرني معه إلى شراء نسختين من كلا الكتابين..وتهنئته بما يتلائم مع المناسبة..وبعدما انتزعت منه اهداءا لشخصي المتواضع على غلاف الكتب..

أقول أنه نتيجة لهذه الظروف فالموضوع التالي سينزل هنا باسمي أنا..

وهذا شيء لاغرابة فيه..فهذا هو قدر الأخ الأكبر دوما..تحمل المسؤولية كاملة..!

آه..شيء آخر..

أطلب من كل من يقرأ هذه التدوينة القادمة أن يدعو للأخ عويس..لأنه يمر منذ أيام عديدة بأزمة منتصف الكلية..وهي امتحانات السنة الخامسة.. ( وكل واحد بقى وذوقه..! )

طبعا أنا لاأخفي شماتتي فيه..والسبب – كما قلنا – أن هذه هي مسؤولية الأخ الأكبر بلا شك..!!
قال ينشر كتاب قال..
هيا القيامة قامت واللا إيه ياجدعان..!!

السبت، 19 سبتمبر 2009

المصير..

متحف التشريح..متحف باثولوجي ( علم الأمراض ).. متحف الشرعي..
هذه المتاحف موجودة بداخل كلية الطب.. في الواقع أي كلية طب تحتوي على عينات مختلفة، وربما نادرة، لمكونات الجسم البشري في هذه المتاحف..
شيء جميل..
ولكن – لابد من لكن هذه – تظل هناك عدة مشاكل – لابد من مشاكل.. !!
العينات يجب أن تحفظ..ولتحفظ يجب أولا وضعها في الفورمالين (سائل أشبه بقيء الشياطين ) ثم توضع في علب زجاجية ( جارات ) ، وبعد ذالك يغلق عليها في دواليب زجاجية ، لحفظها من عوامل التعري اللي هيا الطلبة طبعا..!!
المهم أن هذه الحماية المزدوجة تجعل من الرؤية عملا خارقا ..
أنت مثلا لن ترى أبدا مايوجد في الجار رقم 33 ، ولو رأيت شيئا ما.. فستعتبره قلب مفتوح يبين الصمام الأورطى..زي ما بيقول كتاب القسم المقدس..!
الشيء الداكن المتعفن ده هو قلب مفتوح.. وقال إيه.. فيه صمام أورطى..!
لا يا شيخ..!!!
ناهيك طبعا من الجار رقم 32 اللي في آخر المتحف.. المفترض إنه يكون جنب التاني.. بس الحاجات البسيطة دي مش مهمة..
الجار ده كتاب القسم بيقول عنه إنه قلب برضه.. ومفتوح برضه..بس مافيش صمام المرة دي..فيه حاجة تانية كده مش فاكرها دلوقت.. المهم..شكينا في الموضوع ده.. وقعدنا نبحث فيه لحد ما اكتشفنا – آخر السنة - إن الجار محطوط غلط ناحية الجدار.. يعني لا طلع قلب مفتوح ، ولا طلع فيه البتاعة اللي ناسي اسمها دلوقت..!!
( الموضوع ده بيفكرني بالرقاصة اللي غلطت وعملت فتحة بدلة الرقص بتاعتها من ورا!!)
المخيف في الموضوع ..إن كتاب القسم بيؤكد بكل ثقة إن ده قلب مفتوح - وهو على وضعه ده – وفيه سهم بيشاور على البتاعة الي ناسي اسمها دلوقت..!!
ما علينا..
دي تفاهات..
الكارثة الكبرى..أن الجارات دي عدى عليها وقت طويل ، من غير تبديل أو تحديث..فتحول كل شيء إلى أي شيء آخر..! ولك أن تتخيل ..!!
في واحد من السكاشن..قال لنا واحد من المعيدين .. إنهم لما كانوا طلبة كان أساتذتهم بيشرحوا لهم على الجارات دي..!!
يعني دي جارات أثرية ، حقيقة مش مجاز..!!
يعني تسمية المكان ده بالمتحف ، كانت تسمية على مسمى..وبكده مفترض أنه ينتمي لمصلحة السياحة والآثار.. مش لكلية الطب.. ! وعلى هذا الأساس..اللي يدرس هنا ، مفروض يتخرج عالم آثار أو مرشد سياحي.. مش دكتور..!
ياسيدي.. ماعلينا.. أهو كله أكل عيش..!
بس أنا بقى عمري ماهنسى الجار اللي كنت أعرفه على أساس أنه مخ بشري بنصفيه المنفصلين، ومحاطا بالأغشية المخية الشوكية.. واتضح لنا في آخر السنة ، وحسب الطبعة الجديدة من الكتاب المقدس ، إنه ورم كروي مشقوق إلى نصفين في الرحم..!!
الظريف بقى إن واحد من المعيدين إياهم .. كان بيشرح على الجار ده.. كان بيقول : " قدامنا دلوقت مخ بشري محاط بالأغشية .. " فقاطعناه ، وقلنا له إنه بقى ورم دلوقت.. وبكل لا مبالاة الراجل كمل وقال : " قدامنا دلوقت ورم بشري محاط بالأغشية.." !!
الأظرف من كده بقى المعيدة – اللي من إياهم برضه – لما قلنا ليها إن ده مش طلع مخ بشري.. قالت بكل ثقة .. إنها كانت بتقول دايما ، إن ده عمره مايبقى مخ..
أمال إيه ده ياست الكل..
قالت –بكل ثقة برضه - إن دي عين آدمية محولة شوية..!!
لا إله إلا الله..!!
لا إله إلا الله..!!
الحمد لله إن السنة خلصت.. قبل مايبقى حاجة تانية..
مناخير بشرية.. و اللا كبد بشري..واللا صباع محشي بشري حتى..
محدش بقى ضامن حاجة اليومين دول ياعم..!!

السبت، 28 فبراير 2009

الوصايا العشر قبل أن تشاهد شريحة


الوصايا العشر قبل أن تشاهد شريحة



1. الحذر: لا تثق أبدا بالشريحة هذه قاعدة أساسية، بل إن بعض المبالغين يقولون أوعي تدي ضهرك للشريحة! أخرج من رأسك إن الرقم عليها يعني إنها شريحة كذا أو كيت، أرم ورا ضهرك كل ما يقوله المعيدون وكل ما يتناثر حول هذه الشريحة من إنها تخص كذا. هناك أسس أخري للتعامل مع الشرايح ستعرفها معنا.

2. الخيال: طالب الطب لازم يتمتع بخيال واسع جامح يتعدي الآفاق ويتخطي الحدود ويستطيع أن يتخيل إن الشريحة اللي قدامه مثلا شريحة liver مع إن مفيش أي مصدر إضاءة يعني مثلا يقولك الدكتور إنك هتشوف في الشريحة كذا وكذا يبقي لازم تعمل حسابك انك هاتتخيل إن في الشريحة كذا وكذا وإن شاء الله في المراحل القادمة هاتقدر تتخيل إن في ميكروسكوب وإن في شرايح وانك نجحت في الامتحان.

3. الحب: يمكنك ألا تثق في الشريحة ولكن يجب أن تحبها، أقبل عليها بلهفة وشوق، حسسها انك طول الليل بتحلم امتي العلبة تجيلك علها تبادلك حبا بحب وتطمنلك وتفضفضلك وساعتها تعرف حكايتها بالضبط لكن يجب التعامل بحذر مع هذه القاعدة علشان الموضوع مايطورش ونلاقي الشريحة حامل!!

4. الأمل: لا تيأس أبدا فالحكمة تقول لا يأس مع الحياة ولا حياة مع كلية الطب... خلي أملك في ربنا كبير أنك في يوم من الأيام هاتعرف الشفرة اللي بيحطوا بيها الأرقام علي الشرايح.

5. السرعة والحماس: يجب أن تأخذ الشريحة علي حين غرة... تفاجئها بسرعة شديدة قبل ما تغير جلدها كالحرباء، كثير من الشرايح تم إعدادها بطريقة خاصة حتي تغير من شكلها بل ورقمها في بعض الأحيان واسألني أنا.

6. الحاسة السادسة والسابعة: طالب الطب ليس كأي طالب عادي، يجب أن تنمو لديك باستمرار الحواس الكامنة وبالتدريب تستطيع أن تشعر بالشريحة وتعرفها بمجرد النظر وذلك لأن كل شريحة لها سلوكها المميز وعاداتها ولكن لا يدرك ذلك إلا طالب طب مدرب نمت لديه الحواس الأخري والدليل علي ذلك أنك تجد طالب يعرف الشريحة ولا يستطيع أن يفسر لك إلا لماذا ويقولك هي شكلها كده مع إن شكلها بيفكرك بواحد صحبك إنما هو عرفها بالحاسة السادسة.

7. الحلم سيد الأخلاق: وضبط النفس سياسة حكيمة فهمها فعلت الشريحة أو ضايقك الميكروسكوب خليك انت الكبير ما هو مش معقول تعمل عقلك بعقل شريحة.

8. الإصرار: بالإصرار والعزيمة كل شئ يهون والشريحة اللي ما تجيش بالذوق تيجي بالعافية ويجب أن تكون عند كلمتك إلي ابد الآبدين فلو أنت قلت علي الشريحة إنها كذا فيجب أن تتمسك بموقفك ولو قامت الدنيا وماقعدتش يجب أن تثبت علي موقفك وتكون دماغك دماغ طالب طب حقيقي أي جزمة قديمة.

9. موقف: الرجولة مواقف لذا يجب أن تأخذ من كل شريحة موقف ما فهذه هي المفضلة الدلوعة وهذه يجب أن تضرب بالجزمة كل ما تشوفها وهكذا.

10. الانتقام: انت تنفذ كل شئ وتعمل زي ما بقولك بالضبط حتي الوصايا العشر عملتها وما فيش فايدة إذا لازم الانتقام، تنسي كل شئ عن الحلم وتنتقم، أمال يعني هتكبت في نفسك ده حتي غلط علي الصحة الإنجابية، وفي الانتقام يجب أن تتمتع بكل المادية الممكنة ويكون قلبك أسود وتستمتع وتتفنن في تعذيب الشريحة قبل ما تحطمها إلي 100 حتى وبعد أن تجهز علي العلبة كلها وترمي الميكروسكوب في الشارع أو تلعب بيه رمي الجلة ساعتها بس أقدر أقولك أنك كملت الكورس وتقدر تنام مرتاك وهيكون قدامك مشكلة صغيرة وهي الامتحان بس ماتخافش لأني هاكون معاك في وصايا أخري قبل دخول الامتحان وخليك معايا.