الجمعة، 26 ديسمبر 2008

أيزو...!!

لم أكن أصدق نفسي..أخيرا سيكون لنا مستقبل بهذه الكلية..
كنت أقرأ لوحة المشروع.. والحروف الضخمة التي كتب بها..
" مشروع تطوير التعليم في كلية الطب "
وأشعر بفخر شديد .. وقد أخذت الأحلام تراودني.. أحلام اليقظة.. وأحلام النوم..وأحلام حقيقية مرعبة..!!
كنت أحلم بالمستقبل المشرق بكثافة غير عادية..عندما أتأخر في الاستيقاظ صباحا أكون في حلم.. عندما أحلق ذقني , أنظر في المرآة وتشرد نظراتي ,أكون في حلم.. وتكون النتيجة جرح غائر كأنما كنت مع كفار قريش..
وعندما تناديني أمي لأفعل شيئا ما..أعتذر قائلا أني في حلم..لدرجة أنني كنت أقف ذات مرة مع زميلتي العزيزة.. لاحظت علامات الشرود على وجهي..فسارعت قائلا أنني كنت أحلم بالمستقبل.. ابتسمت..واحمر وجهها خجلا من كلماتي..
مسكينة.. !!
المهم أنني من شدة فرحتي , خاطبت صديقي الأجنبي عبر برنامج الشات.. وقد بعثت هذه الأحلام شعورا بالقوة والثقة بداخلي..أخبرته عن هذه الخطوة الجبارة , وكيف ستكون لنا الريادة في العالم كله.. فبعث إلي برسالة تهنئة رقيقة , لم أفهمها في الواقع.. ما علينا.. إنها نظرية المؤامرة.. !!

******
قابلت "عليش" .. صديقي الوفي , الذي اختار تنسيقه في كلية طب عين شمس , بينما اخترته أنا هنا , لإعتبارات سياسية..
يومها قال لي شيئا ما عن الحمار الذي لا يرى أذنيه الطويلتين.. أو شيئا من هذا القبيل..!
قابلته هذه المرة بترفع , وبنبرة اشمئناط.. قال لي بانكسار..
- ازيك..
لم أرد طبعا.. دي أيزو يارجالة.. أيزو !!
تابع هو بنفس اللهجة..
- صحيح أخبار الأيزو دي !؟
- طبعا مش قادر تصدق.. يابني المكان ده هيتحول لحاجة تانية , بقدرة قادر..
مستشفيات إيه..دكاترة إيه.. أقسام إيه.. معامل إيه.. !
- ياسلام..!
- أمال يابني..تصور إن فيه أمراض جديدة ناويين نكتشفها.. إشي "امتيازوما".. إشي "امتيازأوزز".. وإشي "امتيازأيتس" ..شغل يابني !!
- مش ممكن..!
- طيب عارف .. فيه دراسة جديدة بيعملوها دلوقت , بتتكلم عن جينات الذكاء وعلاقة الوراثة بموضوع أولاد الدكاترة اللي بيطلعوا الأوئل كل سنة..!
- ............!!!؟
- أيوة.. وطبعا انسى بقى الشيتات اللي بننقلها من بعض.. والأبحاث المضروبة.. والواسطة..وامتحانات العملي النصب بتاعة الباطنة..خلاص..!
ارتجفت شفتا "عليش" تأثرا..وجاهد ليقول..
- ممكن.. ممكن.. بعد كل ده.. ممكن نفضل أصحاب ؟!
- ازاي تقول الكلام ده يا "عليش" ؟ .. أنا من دلوقت ولحد يوم الحساب.. مش عايز أشوف وشك تاني.. ياللا يا جزمة !!

******
أخذت أروج بحماس لفكرة الأيزو..
فقلت هذا الموضوع لخالتي " فوقية " ففرقعت ( زغروتة ) , وقالت لي بسعادة..
- عقبال ما أشوفك معلقه في صدرك وانت مع عروستك..!
وهنا أطلت عروستي.. أقصد بنت خالتي.. وابتسمت..
مسكينة..!!
ولما ركبت تاكسي..( بقولك أيزو يا عم ! ) أخبرت السائق , فضيق عينيه في ذكاء قائلا..
- زي كفروتكس , بتاع الصراصير.. مش كدة برضك يابيه ؟!
صراصير؟!!
ما علينا..
ده حتى الواد البلطجي اللي في شارعنا، لما طلع المطوة في وشي , وقاللي اعلى بالمحفظة ياض.. بصيت ليه بكبرياء , وقلت له إني معايا الأيزو..
صحيح إنه قعد يفتش فيا عن الأيزو ده.. وفي الآخر روحت بالملابس ال......إحم...!
بس مش مهم.. كله يهون , علشان خاطر الأيزو..!!

******
وذهبت أيام.. وجاءت أيام.. وهدأ الموضوع قليلا..
و عندما كنت ذاهبا لكي أدفع المصاريف – التي أصبحت بمعجزة ما ضعف السنة الماضية – فوجئت بلوحة أنيقة.. قرأتها , فذهلت..! كانت هذه شهادة الأيزو..!!
الله ..؟!
أمال فين لجنة الدكاترة الأجانب.. والدكتورة أم شعر أحمر , وبنطلون من غير
كم ..؟! فين لجنة الطلبة المشاركة ؟ وفين ميثاق المشروع ؟!
الله.. ؟!
احنا بناخد على قفانا واللا إيه ؟!
ما علينا.......
المهم إن أحنا أخدنا الأيزو...!!

******
بعد ثلاث سنوات من بداية المشروع..لا زالت الكلية كما هي..
لا معامل.. ولا دكاترة.. ولاطلبة..!!
امبارح الدكتور في امتحان النساء, إدى الواد ابن زميله خمسة وستين من ستين.. وسيد لسه ناقل شيتات الأطفال من محمود.. وأنا كنت قاعد من ساعتين على النت , باضرب البحث.. ولما قابلت الواد "عليش" من شهر كده .. بص ليا باحتقار.. وقاللي.. ياللا يابتاع الأيزو.. ياجزمة !!
الله..؟!
هو إيه الموضوع..؟
احنا أخدنا الأيزو ده ازاي بالظبط ؟!!
فوزي الخرطوم

السبت، 11 أكتوبر 2008

MCQ

MCQ

عشان تتفوق فى أى كلية لازم
أ‌- تفهم كويس
ب‌- تحفظ كويس
جـ - أ , ب معا
ء – تكون ابن دكتور

دحيح اتجوز دحيحة يخلفو للبشرية
أ‌- ولد ويسموه مرجع
ب‌- بنت ويسموها مذكرة
جـ - مش هايكون عندهم وقت يخلفو

تفتكر ليه كتير من ولاد الاساتذة بيتجوزو برده ولاد اساتذة
أ‌- لحفظ النوع
ب‌- انتخاب طبيعى والبقاء للاقوى
جـ - حتى يظل الدم الازرق نقيا


كلية الطب
أ‌- مافياش بنات جامدة
ب - مافيهاش بنات حلوة
جـ - مفيهاش بنات أساسا


المدرج بتاع المحاضرات
أ‌- موجود بس معرفش مكانه
ب‌- مش موجود اساسا
جـ - معرفش إذا كان موجود أ و مش موجود

الاسر فى الكلية
أ - مالهاش لازمة
ب - ملهاش لازمة خالص
جـ - اشتغالة
ء ـ نصب



اتحاد الطلبة فى الكلية
أ‌- مالوش لازمة
ب ـ مالوش لازمة خالص
جـ - اشتغالة
ء – نصب


لو بقيت عميد كلية ..أول حاجة تعملها
أ‌- تشوف الطلبة عايزه ايه وتعمله
ب‌- تشوف الطلبة عايزه ايه وماتعملوش
جـ - تشوف الطلبة عايزه ايه وتعمل عكسه
ء – مش هايكون عندك وقت تشوف الطلبة


احسن كلية طب ف مصر
ا- القاهرة
ب- اسكندرية
جـ - عين شمس
ء - مفيش كليات طب ف مصر

تفتكر ليه ادباء وفنانين كتير متخرجين اساسا من كلية الطب
ا- لانهم بيشوفو الانسان ف اضعف حالاته وده بيدفعهم للابداع
ب - مبيلاقوش شغل فبيتجهو لاى حاجة ومنهم اللى بينجح فى الادب
جـ - المعاناة والالم والقرف فى دراساتهم بيدفعهم للابداع
ء- هما اساسا محظوظين بدليل مجموعهم فى الثانوية العام

أفضل سنتر للدروس
أ‌- الربيع ويسع 500 طالب
ب‌- الفتح ويسع 1000 طالب
جـ ـ الطاهر ويسع 2000 طالب
ء ـ مفيش دروس فى طب



أسوأ واحد شرح لى فى حياتى
أ‌- دكتو......... مدرس الحساب
ب‌- دكتـ ........ مدرس الانجليزى
جـ ـ د............مدرس الكيميا
ء – أنا اللى كنت غبى

أحسن سكشن حضرته فى حياتى
أ‌- اللى شرحه دكتور فلان
ب‌- اللى شرحته دكتورة فلانه
جـ - اللى اتعرفت فيه على فلانه

أحسن محاضرة حضرتها فى حياتى
أ - اللى شرحها دكتور فلان
ب- اللى شرحتها دكتورة فلانة
جـ - اللى انفصلت فيها عن فلانة

الفرق بين خريجى الطب , الهندسة , الصيدلة , التجارة , الحقوق
أ – نوع الدراسة
ب- مدة الدراسة
جـ- حاجة سوق العمل اليهم
ء- مجموع الثانوية العامة

وجه الشبه بين دارسى الطب , الهندصة , الصيدلة , التجارة , الحقو
أ – الدراسة سهلة
ب- الدراسة صعبة
جـ - كفاءة الاساتذة
ء – كله هايقعد على نفس القهوة

اثر تقليل اعداد الطلبة فى الدفعة القادمة الى كلية الطب الى 350 على الطلبة
أ – يقل الزحام بنسبة 50%
ب – تزيد فرص الاستيعاب الى 50 %
جـ - تزيد جودة التعليم بنسبة 25 %
ء – تقل فرص وجود بنات حلوة الى الصفر


اثر تقليل اعداد الطلبةعلى الدكاترة
أ‌- تزيد قدرتهم على الشرح
ب‌- تقل عدد ساعات العمل
جـ- يزيد تجاوبهم مع الطلبة
ء – تقل الدروس


التعيين فى الجامعة
أ – بالأفضلية
ب – باللي يلحق
جـ - بالبركة
ء – بإثبات النسب
عويس التانى المنتظر

الأربعاء، 24 سبتمبر 2008

الطب ضاااااااار جدا بالصحة


تحذير...
الطب ضار جدا بالصحة..!!

بعد الضغوط الرهيبة التي مارستها الأمم المتحدة ، و بإيعاز من المجلس القومي لحقوق الإنسان ..تقرر انشاء لجنة تقصي الحقائق لمتابعة ما يحدث في كلية الطب ، من التأثيرات الرهيبة ، والتجاوزات اللاانسانية التي تمارس بانتظام ضد طلبة الكلية..
هذه الضغوط – قسناها بجهاز الضغط – بدأت بملاحظات حول الحالة المزرية التي يكون فيها الطلبة ، والتي يبدأ أثرها بعد دخول الكلية مباشرة ، وتظل تسوء بمعدل ثابت ، حتى يتخرج الطلبة بعد سنين الدراسة – يديك طولة العمر – إلى الحياة العملية..
وتؤكد الدراسات الجادة أنه و بعد بحث شاق أجراه خبراء عالميون - من مركز الأبحاث العالمي في مملكة مدغشقر – أن كل واحد من هؤلاء الطلبة يدخل الكلية بمخ طبيعي ، ويخرج منها – أو لا يخرج _ بفردة جزمة قديمة.. وأحيانا فردتين.. !!
يقول الدكتور عبدربه ألفونسو " المسألة تبدأ من سنة أولى.. بفترة حضانة تختلف من واحد للتاني ، قبل ما تبتدي الأعراض المأساوية .. وفي الواقع احنا سجلنا حالات نادرة ابتدأت من بعد شهرين بس من سنة أولى.."
الأعراض التي تتراوح ما بين اكتئاب وبلاهة مطلقة.. مرورا بالتخلف العقلي وانعدام حالة التوازن، و قد تتطور إلى ضمور حاد في عضلات المخ.. هذه الأعراض تم الاتفاق على تسميتها باسم " متلازمة حمادة – تاتو " " Hamada – Tato Syndrome "-- .. نسبة لأول شهيدين في كلية الطب.. وبطبيعة الحال تم تسجيل هذه الأعراض في مراجع الطب العالمية.. والكتب كتير للي عايز يقرأ.. " المصير ".. " البداية والنهايه " .. " كتاب د. نظيرة ".. و" كيف ابتدأ كل شيء " ..إلخ..إلخ..
اللطيف في الموضوع كما يقول الدكتور سيد ألفونسو أن الأعراض دي بتيجي في صورة نوبات متكررة.. يعني المصاب يمكن يمارس حياته الطبيعية تماما.. وعلشان كده أحيانا بيبقى اكتشاف الموضوع ده مش دايما في الوقت المناسب.. لدرجة إن المرحوم حمادة كان رئيس قسم "............. " في واحدة من الكليات العريقة..وكان مرشح يبقى عميد.. أما تاتو فبقى عميد فعلا في نفس الجامعة..!!
وطبعا لأن اللجنة اتوضعت خصيصا لتقصي الحقائق ، فخرجت بشوية توصيات أهمها والكلام للدكتور عباس ألفونسو : واحد..صرف رواتب الخبراء الأجانب د. ألفونسو وأخواته.. اتنين.. صرف بدلات الخبراء الأجانب د. ألفونسو وأخواته..أربعة..- مافيش تلاتة ؟! - انشاء لجنة تقصي حقائق أخرى ، وتكون محايدة ، لتأكيد المعلومات السابقة ، وبذلك تقرر أن تكون برئاسة الدكتورة زليخة ألفونسو..!!!!
وطبعا كل ده تحت اشراف حضرة سعادة فخامة جناب السيد عميد الكلية المذكور أعلاه..!!!!

*******
انتم عايزين رأيي ؟؟
احنا ممكن نطبع ورقة مكتوب عليها العبارة دي : " تحذير.. الطب ضار جدا بالصحة..!! " وتبقى الحكاية زي السجاير.. وممكن كمان يحطوا عليها صورة الدكتور تاتو علشان الحكاية تبقى أكثر واقعية.. ويبقوا يوزعوا الورقة دي في مكاتب التنسيق في مصر كلها..
وقد أعذر من أنذر بقى...!!!!


الاثنين، 8 سبتمبر 2008

وصايا عويس الأخيرة ....الجزء الأول....الشاعر عويس دنجل

المجد للجدعان
الذين قالوا لا فى وجه من قالوا نعم
اللى اتبهدلو من الدكاترة وظلو روحا أبدية الألم

أيها الداخلون إلى كلية الطب
ودّعوا مززكم
إنى تركت مزتى بلا وداع
وتركت العيشة الروشة
ودخلت الطب  بلا داع

لا تحلموا  بعالم سعيد
فخلف  كل رئيس  قسم  
رئيس  قسم  جديد
وخلف كل طالب قال لا
قلب كسير .. ودمعة سدى

معلق أنا  من رجليّـا
والضرب نازل عليا
والأندال .. محدش سأل فيّـا
هل المجد؟..  أن تكون جبهتك إلى الأرض
وقدماك إلى السماء
إذا جاء طالب بعدى وأراد قول  لا
فعلموه الانحناء
علموه الانحناء
علموه الانحناء
                         
                         عويس التانى المنتظر


درس خصوصى


درس خصوصي...

هذه بعض الأمور التي تتعلق بالدروس الخصوصية في الكلية..
إعلانات.. محادثات.. أوراق.. شائعات..
ضعها كما يتراءى لك.. قصة..مقال.. مسرحية.. لا يهم..
فهذا هو الواقع....!!!!


1) في محاضرة ما: ( أول محاضرة للفرقة الأولى )
دخل الدكتور..وعرفنا بنفسه.. د. فلان الفلاني.. أستاذ مادة كذا..ورئيس قسم كذا.. ومدير كذا.. ووكيل الكلية لكذا وكذا....إلخ . بعد المقدمة الطويلة..قال الدكتور بفخر شديد.. " أنا معروف في الكلية كلها بأني ضد الدروس الخصوصية.. وبحاربها بكل قوتي.. تأكدوا تماما.. إن معايا مش هتحتاجوا أي دروس.." .استبشرنا خيرا.. وابتدأ الشرح..
بعد أن انتهت المحاضرة.. أيقظت زميلي ، وسألته في اهتمام : " هتاخد درس عند مين..؟! "

2) في حوار مع العميد:
- وما رأي سيادتكم في موضوع الدروس ؟
- والله ده موضوع خطير جدا.. واحنا مجتمعين دلوقت علشان نحط حد للموضوع ده.
- وإيه أهم الخطوات العملية اللي سيادتكم هتتخذوها ؟
- الدكتور والطلبة اللي هايتثبت أنهم بتوع دروس ، هيتعرضوا لعقاب رادع.. الدكتور مثلا هنوجه له إنذار شديد اللهجة.
- والطالب ؟
- هنحوله لفرع الكلية في جوانتانمو !!!

3) صورة من إعلان كان يوزع أمام المدرج:

" نحن الأقوى.. نحن الأفضل..نحن الأخبر.. (أي الأكثر خبرة !! )
تعالى معانا والدنيا هتحلى معاك .. ومعانا..!!
دروس في كل المواد.. نخبة من أفضل الدكاترة..
في سنتر " خلي الدماغ صاحي " ..
الحجز مقدما..
** عرض خاص : خد درسين وهتاخد التالت هدية ..!!
الحق العرض..!!

4) صورة من إعلان معلق على لوحة إعلانات الكلية:
يعلن د. فلان الفلاني عن بدء مجموعة التقوية – الإسم الرسمي للدروس الخصوصية – في مادة كذا...... . الحجز لدى السكرتارية.
5 ) تعليق على الإعلان السابق: ( مكتوب بخط اليد )
ربنا ينتقم منكم يا ظلمة..!!
6) إشاعة رقم ( 1):
- سمعت الأخبار الجديدة..؟ -خير..
- هايغلوا تعريفة الدخول للسنتر..! - مش معقول..
- أيوة يابني.. أصلهم قرروا يشيلوا الدعم...!!
- ؟؟؟؟!!!
7) صورة من تقرير النيابة:
وبشأن حادثة الشاب الذي فتح رأس زميله أمام مقر الدرس ،وبسؤاله عن فعلته تلك أجاب بأن زميله رفض أن يسلفه نصف جنيه ليكمل رسم الدخول للسنتر ، وبذلك ضاع الدرس عليه.. وبسؤال المجني عليه عن السبب ، برر فعلته تلك بأنه أخبر صديقه بشأن زيادة التعريفة ، لكنه لم يصدق.. وبذلك أخلى مسؤوليته عنه..!
وبذلك أمرنا نحن حضرة ،سعادة ، فخامة ، السيد وكيل النيابة بحبس المتهم أربعة أيام على ذمة الدرس....!!!

8) تقرير صحفي رقم (1) :
" وقد تزايدت ثقافة العنف عند الشباب بسبب الدروس الخصوصية ، وما ينتج عنها من انحراف في نفسية الشباب.. وبشأن الجريمة السابقة فقد توجهنا بالسؤال إلى الدكتور فلان الفلاني عالم الجريمة الإجتماعية فأجاب قائلا ..أن التفكك الإجتماعي وانهيار تقاليد الإبتداع عند الشباب الميلودرامي ، ينتج عنه نفسية معقدة قابلة للتقهقر الإمبريولوجي ،وهو ما يؤدي بالتبعية السسيولوجية إلى.... إلخ..إلخ.."

9) من تصريحات السيد وزير التعليم العالي لسنة 1970 :
"ولسوف نتصدى لهذه الظاهرة بكل حزم وقوة.. ولسوف نفخر دوما بمجانية التعليم في بلادنا..إلخ..إلخ... "

10) من تصريحات السيد وزير التعليم العالي لسنة 2008 :
"ولسوف نتصدى لهذه الظاهرة بكل حزم وقوة.. ولسوف نفخر دوما بمجانية التعليم في بلادنا..إلخ..إلخ.. "
؟؟؟!!!!!

11) صورة من تقرير الطبيب النفسي :
" وبتوقيع الكشف الطبي على الطالب فلان الفلاني.. تبين أنه مصاب بانهيار عصبي عنيف ، وحالة حادة من الفصام التي أدت إلى هلاوس بصرية وسمعية.. والسبب هو الصدمة التي تلقاها عندما أخبره صديقه عن سعر الدرس الواحد في كلية الطب.. وسوف ينتج عن ذلك آثار جسيمة ربما تصل إلى تخلف عقلي أوجنون ذهولي على أقل تقدير.. "



12) صورة من تقرير الطبيب الشرعي :
"وبتوقيع الكشف الطبي على المذكور أعلاه ، فقد تبين أن شريان أساسي في دماغه قد انفجر ،ومرارته اتفقعت مماأدى إلى إصابته بنزيف داخلي عنيف.. وذلك على إثر سماعه الخبر المشؤوم بتعليق عضويته في سنتر"خللي الدماغ صاحي" ، لتأخره عن دفع الأقساط ولقد تم إجراء اللازم لكن الوضع كان ميؤوسا منه..."

13) ملصق إعلاني:(عن الحركة المصرية التعليمية من أجل التغيير)
يوضح الملصق شكل شاب منهار ، منكوش الشعر ، أحمر العينين.. يرتدي فانلة وشورت وشبشب.. تحت الملصق تعليق..
"لا للدروس الخصوصية "
!!!!!!!
14) إشاعة رقم (2) :
- سمعت المصيبة..؟ -خييييير...!
- الدكتور فلان هايغلي الدرس في المادة اللي هناخدها السنة الجاية ...
- كده.. ! طب عن إذنك.. – رايح فين ؟
- هاخد الدرس السنة دي.. حد عارف إيه اللي هايحصل السنة اللي جاية...!!!

15) تقرير صحفي رقم (2) :
"وقد اندلعت المظاهرات المنددة بسياسة سنتر "خللي الدماغ صاحي " وقام الطلبة المتظاهرون بحرق إعلانات السنتر في الشوارع ، مطالبين بتخفيض الأسعار ، وانطلقت الشعارات النارية ضد القائمين على هذا السنتر....إلخ "

16) من مجلس الشعب :
وقد قدم نواب المعارضة استجوابا عاجلا إلى السيد رئيس المجلس ، وقام وزير التعليم العالي بإعلان قانون الدروس الخصوصية الجديد..وهو وضع تسعيرة حكومية لكل مادة.. المخالف لذلك يقع تحت طائلة القانون.. وتم التصويت على القرار بطريقة
الموافق على الإقتراح يتفضل برفع يده.. موافقة !!!!!

17) اجتماعيات :
يتقدم الإخوة الزملاء بالتعازي الحارة ألى أهل الفقيد الزميل فلان الفلاني .. ابن العائلة الفلانية ، وصديق كل من فلان وفلان وفلان أبناء عائلة علان....إلخ..إلخ..
وقد توفي المرحوم بعد صراع طويل مع الدروس الخصوصية.. وقد شيعه الزملاء الأفاضل مرددين عبارات مثل.. " الولد مات بحسرته " .. و "أنتم السابقون ونحن اللاحقون بإذن الله.." ..!! وقد انفض العزاء سريعا ليلحق الجميع بميعاد الدرس الخصوصي.. !!
أسكن الله الفقيد فسيح جناته...!!!!



فوزى  ابن  الناظر الخرطوم















الأربعاء، 27 أغسطس 2008

كلمات متقاطعة محلولة



أفقى
1- البيج بوس / للإكراه
2- مكان للنوم / متتاليان (معكوسة)
3- تشعر به فى الكلية / للعطف / درجات
4- من النباتات
5- تحلم به بعد التخرج / متشابهان
6- للعطف (معكوسة) / خطيئة كبرى فى الكلية
7- تذهب للسكشن أو الروند فقط من أجله / حرف جر (معكوسة)
8- التخرج من ظلام الكلية / المصير ( معكوسة )
9- المكان الوحيد للتعليم فى طب
10-كلية بهيجة جدا / حرف نفى / للأبحاث
رأسى
1- الأمل والعشق والهوى/ للنجاح
2- بعد الشر .......
3- جرح (معكوسة)
4- كتاب مقدس فى طب
5- يعالج
6- فقط بها تتعلم / لا توجد فى طب
7- لا تذهب إليه مطلقا
8- تقولها للكلية ولا تقولها لوالديك
9- يذاكر / دخل طب بمزاجه
10- قال لا فى طب / تفقده عند دخولك طب
عويس التانى المنتظر

الثلاثاء، 26 أغسطس 2008

الوصايا العشر للنجاة في كلية الطب

مقتبسات من كتاب الجهلاء
لإبن الناظر الفوزي

1 ) لا تفكر :
التفكير خطيئة.. هذا هو ماتربينا عليه منذ الصغر..وهذا من عاداتنا وتقاليدنا العظيمة التي يجب أن نحافظ عليها..فيجب أن تتعلم أن لا تفكر..وحاول أن تجاهد نفسك الأمارة بالسوء..
أقصد الأمارة بالتفكير..

2 ) لا تسأل :
لا تسأل أي أحد عن أي شيء.. فلن يتطوع أحد لإجابتك.. بل وربما يخبرك بمعلومات مغلوطة..
اتبع غريزتك..اعتمد على نفسك..لتقوي في نفسك الإحساس بالمسؤولية..

3 ) لا تجادل :
وخذ ما يقال لك كأنه حقائق مسلم بها ، ولو قالوا لك بأن الشمس تشرق من المفرب..ولو قالوا ان الشمس لا تشرق أصلا..!
فلن تأت أنت – يا طالب – لتغير موازين الكون.. عفوا.. موازين الكلية..
ولسوف تسمع عبارة الطالب غير قادر على تقييم أستاذه..أبدا
طب اشمعنى ..؟! أهو.. غلاسة كده.. اعترض بقى..!
عامة ستسمعها قريبا.. وعندها..سوف تصدقني ..!ّ!

4 ) لا تصدق :
لاتصدق أي تصريحات تخرج من مبنى إدارة الكلية..ولا أي كلام يقال عن ارتفاع الدرجات آخر السنة.. أو ارتفاع مستوى الطلبة - أهم دول الحاجة الوحيدة اللي بتترفع في الموضوع ده !
وصدق الشائعات.. فهي تصبح دوما حقائق..

5 ) لا تحضر محاضرات :
لاتحضر محاضرات في الكلية أبدا..( طبعا باستثناء محاضرة رئيس القسم اللي بيحدد فيها الإمتحان )..المحاضرات رجس من عمل الشيطان.. الداخل فيها مفقود.. والخارج منها.. مفقود برضه !!

6) لا تذاكر :
من كتاب القسم..وفر منه فرارك من الكلب المسعور.. واعلم أنه من كان يملك كتاب القسم ، فقد باء بسخط الأساتذة أنفسهم.. ( مع أنهم هم اللي ألفوه !! ) .. ولو ذاكرت ، لا تقل لأحد أبدا..وإذا سألك أحد ، لا تذكر الحقيقة.. اتغابى..!
ابحث دوما عن ورق الدروس.. ابحث ولو في الصين.. واحفظ مذكرة الإمتحانات.. فهي دستورك في هذه الكلية..


7 ) ابحث عن الواسطة :
فهي مفتاح كل شيء في هذه الكلية..درجات مرتفعة مش تعرف جاية منين..الدكتور يدلعك.. فى الشفوى تدخل لمين .. تخرج من عنده سليم..المتحف يتفتحلك مخصوص..تستلم علبتين شرائح مجانا.. تاخد جثة معاك البيت.. امتحانك الشفوي يكون في الأول بدل ما تترمي في آخر الدفعة..
وياريت تفتكر المثل اللي بيقول.. يابخت من كان رئيس القسم خاله..أو عمه..أو أبوه..أو أمه..إلخ..إلخ..

8 ) ابحث عن الدرس :
أينما وجد الدرس، وجد التفوق.. هذه مقولة عظيمة للمعلم الأعظم مش عارف مين كده.. وقالها في درس خصوصي بالمناسبة..
المهم .. ابحث جيدا.. وتذكر أيام الثانوية العامة.. تذكرها بحسرة.. لأنك هاتبيع اللي وراك واللي قدامك علشان درس واحد بس..

9 ) كن وغدا :
أهم نصيحة في الليلة دي.. كن وغدا ..مع زملائك..مع أصدقائك..مع الجو بتاعك..مع الدكاترة.. مع أي حد تقابله..ومع العمال بالذات..لكن بحذر..فهم القوة النافذة في القسم ، بعد الرئيس مباشرة.. وارجع للنصيحة رقم سبعة.. وافتكر معايا.. يابخت من كان العامل..خاله.. أو عمه.. أو أبوه.. إلخ.. إلخ..

10 ) النصيحة العاشرة :
كن متأكدا دوما..أنك كنت لاشيء قبل الكلية.. وأنك ستصبح بعد التخرج – بعد عمر طوييييييل – لاشيء برضه..
إن الحياة ليست وردية كما يقولون.. بل هي أكثر سوادا من شعرك.. لا مؤاخذة لو كنت أقرع يعني ..
كن دوما مؤمنا بالمقولة الشهيرة.. إذاعجزت عن الحياة في كلية الطب.. فاذهب إلى كلية الآداب.. أو اذهب للجحيم..!!



أنا قلت كلامي.. وكل واحد بقى وضميره..

سلام..
ابن الناظر فوزي الخرطوم